Pinoy Pamahiin: Lamang lupa

by

Maria Angela Gonzales

Hindi man natin sila nakikita pero nagagawa pa rin nila tayong makasalamuha sa araw-araw. Ewan nga lang kung maituturing na masusuwerte ang mga may third eye dahil hindi nagiging imbisibol sa paningin nila ang iba’t ibang elemento tulad ng duwento, whte lady o lamang lupa na siyang bida sa artikulo natin ngayon.

Mag-ingat ka! ‘Yan ang maipapayo ko sa’yo kung pupunta ka sa malalayo o masusukal na lugar. Kalimitan kasi, doon sila namumugad.Gayunpaman, maaari ring hindi mo na kailangan pang lumayo. May pagkakataon kasing naririyan lamang sila sa’yong paligid. Maaaring nasa bakuran mo o kaya naman ay nasa loob mismo ng iyong bahay.

Sa Pinoy Pamahiin: Lamang-lupa ay magagawa kitang bigyan ng babala kaya huwag na huwag mo itong iisnabing basahin.

Una, magsabi ng ‘tabi-tabi po’. Kahit na nasa sarili mo ikaw na lugar, huwag ka pa ring maging kampanteng dahil pagsapit ng dilim, hindi na lang ikaw ang naglalakad sa inyong bakuran. Kaya, importanteng magsabi ka ng ‘tabi-tabi po’ para mabigyan mo sila ng babala na daraan ka. Huwag mo na isiping para kang nasisiraan ng ulo kapag ibinulalas mo ang mga katagang ito dahil para rin naman ito sa’yong kabutihan. Sige ka kapag nagkamali kang matapakan sila ay maaari ka nilang parusahan. Gugustuhin mo pa bang masaktan o magkasakit?

Pangalawa, baligtarin ang damit kapag naliligaw. Kung naglalakad ka sa gubat at pakiramdam mo ay pabalik-balik ka lang, ibig sabihin, napaglalaruan ka ng mga elemento. Kaya, baligtarin mo ang damit mo kung ibig mong makalabas pa sa gubat.

Pangatlo, huwag sisipol kapag ikaw ay nasa gubat. Pupuwede kasing gayahin ng engkanto at magiging dahilan iyon para ikaw ay magkasakit. Hindi mo naman siguro gusting manghina, hindi ba? Kaya, huwag mong bigyan ng dahilan ang mga elemento para pagkatuwaan ka.

Pang-apat, huwag basta-basta magpuputol ng punung kahoy. Lagot ka sa lamang lupa na nakatira sa punong iyon kapag nasira mo. Hindi lang simpleng parusa ang ipapataw niya sa’yo. Maaari ka niyang hatulan ng kamatayan kung magiging matigas ka at hindi ka niya patatawarin.

Pang-lima, magpatawas. Kung ang karamdaman mo ay hindi gumagaling o napapagaling ng doktor, magpunta sa albularyo.Tanging sila ang makakatulong sa’yo dahil may kakayahan silang pagalingin ka. Kung nausog ka kasi, hindi ‘yan basta-basta mawawala. Kinakailangan pang malawayan ka ng nakausog sa’yo o kaya naman ay mapakuluan ang damit na suot noong nabati ka.

Pang anim, magdala ng luya. Hindi gusto ng mga engkanto ang amoy na ‘yan kaya kung aalis ka at pupunta sa malayo, kailangan mong pahiran ang buo mong katawan ng luya para hindi ka mapahamak sa kanila.

O, sana ay nabalaan kita ng husto, ah.

Please LIKE & SHARE kung nagustuhan mo ang artikulong Pinoy Pamahiin: Lamang-Lupa.